Senatning Budjet va iqtisodiy masalalar qo‘mitasi tomonidan genderga yo‘naltirilgan budjetlashtirishni O‘zbekiston amaliyotiga joriy etish yuzasidan mahalliy Kengash deputatlariga seminar o‘tkazildi.
Senatorlar tomonidan davlat moliyasini boshqarish tizimini takomillashtirish, xususan, genderga yo‘naltirilgan byudjetlashtirish tizimini joriy etish bo‘yicha so‘nggi yillarda amalga oshirilgan islohotlarga to‘xtalib o‘tdi.
Gender tahlilini rejalashtirish va budjetlashtirish jarayonlariga integratsiya qilish orqali, jamiyatimiz turli ehtiyojlariga javob beradigan va budjet mablag‘larini barcha jihatlarni inobatga olgan holda taqsimlaydigan yana-da samaraliroq moliyalashtirish tizimi yaratilishi alohida qayd etildi.
Shuningdek, ushbu tizim bizga yanada shaffof, inklyuziv va natijaga yo‘naltirilgan davlat moliyasini taqdim etishda yordam berishi, bu esa milliy rivojlanish ustuvorligimiz va maqsadlarimizga erishish uchun asosiy vosita bo‘lib xizmat qilishi taʼkidlandi.
Tadbir doirasida genderga yo‘naltirilgan budjetlashtirishga oid metodologiyalarni takomillashtirish, xalqaro tajribalarni o‘rganish va amaliyotga joriy etish bo‘yicha takliflar ilgari surildi. Senat aʼzolari ushbu yo‘nalishda mamlakatimizda mavjud imkoniyatlar va istiqbollar yuzasidan o‘z fikr-mulohazalari, taklif va tavsiyalarini bildirdi.
Seminarda genderga sezgir budjetlashtirish tizimini rivojlantirish bo‘yicha kelgusi rejalar muhokama qilindi hamda hududiy darajada uni joriy etish mexanizmlari yuzasidan fikr almashildi.
