27-may kuni Senat Raisi Tanzila Narbayeva “BMT-ayollar” tuzilmasining O‘zbekistondagi vakolatxonasi tantanali ochilishi marosimida ishtirok etish uchun mamlakatimizga kelgan “BMT-ayollar” tuzilmasining Sharqiy Yevropa va Markaziy Osiyo bo‘yicha mintaqaviy ofisi direktori o‘rinbosari Eliza Fernandes Sayens bilan uchrashuv o‘tkazdi.
Uchrashuvda O‘zbekiston va “BMT-ayollar” tuzilmasi o‘rtasida gender tenglikni ilgari surish, xotin-qizlar huquqlarini himoya qilish, ularning mamlakat ijtimoiy-siyosiy va iqtisodiy hayotidagi faol ishtirokini qo‘llab-quvvatlash sohasidagi hamkorlikni kengaytirishning amaldagi natijalari va istiqbollari muhokama qilindi.
So‘nggi yillarda O‘zbekiston teng huquq va imkoniyatlar siyosatini amalga oshirishda sezilarli yutuqlarga erishganini taʼkidlandi.
Boshqaruv va parlamentda ayollar ulushi ortgani, 25 ming nafar yetakchilik salohiyatiga ega xotin-qizlar zaxirasi shakllantirilgani, 2030 yilga qadar O‘zbekiston Respublikasida gender tenglikka erishish yangi strategiyasi qabul qilingani kabi asosiy yutuqlar taʼkidlab o‘tildi.
Uchrashuv yakunida tomonlarning Barqaror rivojlanish maqsadlariga erishish va institutsional hamkorlikni mustahkamlashga qaratilgan hamkorlikni kengaytirish hamda qo‘shma loyihalarni amalga oshirishga tayyor ekanligi bildirildi.
