Joriy yilning 20-avgust kuni Oliy Majlis Senati va Migratsiya bo‘yicha xalqaro tashkilotning (MXT) O‘zbekistondagi vakolatxonasi tomonidan “O‘zbekistonda gender tenglik va inson huquqlariga asoslangan migratsiya siyosatini ishlab chiqish” mavzusida tashkil etilgan trening o‘z ishini boshladi.
Trening to‘rt kun davom etadi. Treningni tashkil etishdan ko‘zlangan asosiy maqsad O‘zbekistonning migratsiya strategiyasini ishlab chiqishda Senat huzurida tashkil etilgan ishchi guruh aʼzolariga xalqaro normalar va xorijiy davlatlar tajribasi to‘g‘risida maʼlumotlar berishdan iborat.
Ushbu tadbir O‘zbekiston Respublikasi Prezidentining 2024-yil 4-apreldagi “Mehnat migratsiyasi jarayonlarini takomillashtirish hamda xorijda vaqtincha mehnat faoliyatini amalga oshirayotgan shaxslarni qo‘llab-quvvatlashga doir qo‘shimcha chora-tadbirlar to‘g‘risida”gi Farmonida ko‘zda tutilgan vazifalarni amalga oshirishga qaratilganligi bilan ham ahamiyatlidir.
